الوصفة جدًا سهلة راح أعطيكم وصفات ثلاث أشياء ( خبز الشيباتا ، دجاج التندوري ، وصوص الأعشاب ) ، في الصورة موجود ساندويش دجاج التندوري وساندويتش جبن موزاريلا الطازجة ( مكوناته سهلة بذكرها بالأخير )


الخبز جدًا سهل ومايأخذ وقت ، اهم شيء في خبز الشيباتا إنا نحاول قد مانقدر نحافظ على الهواء اللي فيه بعد التخمير.


المكونات :
٤٥٠ جرام ( ثلاث أكواب ) دقيق ، وإذا عندكم دقيق خبز استخدموه .
٣٤٠ ( كوب + ثلثين كوب ) ماء دافي
٢/١ ملعقة كبيرة خميرة
٢ ملعقة كبيرة زيت زيتون
١ ٢/١ ملعقة ونص ملح

 

 

 خلطة شاي الكرك الفاخرة من يتوق



الطريقة :

نحط الدقيق والزيت والملح في العجانة ، نذوب الخميرة في الماء ، ونضيفها للدقيق نبدأ العجن ( العجينة بتصير لينة جدًا وتلصق باليد ( رخوه ) ومع العجن تلاحظون إنها تتماسك وبمجرد ماتوقفون عجن بتشوفون إنها انبسطت ورجعت لشكلها اللين ، هذي مو مشكلة هذا هو المطلوب بهالخبز ) العجن يكون لمدة ٥ دقايق على سرعة وسط ، ولو العجن باليد يعجن إلين يصير العجين ناعم ،ثم نجيب صحن عميق وكبير نحط زيت ونحاول نكثر شوي لأن العجين بيكون يلصق وبنفس الوقت مانبغى نلمسه ونضغط عليه بقوه بعد التخمير عشان الهواء مايطلع ، مع الزيت بتطلع بسهولة وماتلصق ، بس نقلب الصحن على سطح المطبخ وهي بتنزل من نفسها بدون نلمسها، طيب وقت التخمير من ٤٥ دقيقة إلى ساعة ، إلين يتضاعف حجمها ، بعد التخمير نحط على سطح المطبخ ورق زبدة نرش على سطح المطبخ دقيق نقلب الصحن اللي فيه العجينة عشان نطلع العجينة منه ثم نرش بعد دقيق عليها من فوق الحين نقص العجينة قسمين نحاول نساوي شكلهم على شكل مستطيل بدون ضغط وتمغيط زي ماقلت نغطيها ونخليها ١٥ دقيقة ..الحين ننقلها لصينية الفرن ، ولأننا حطينا ورق زبدة فماراح يتعبنا النقل بس نرفع ورق الزبدة بشويش وننقلها .. ندخلها الفرن على حرارة ٢٠٠ لمدة ٢٥ دقيقة أو إلين تتحمر شوي


مكونات الدجاج التندوري :
٢ صدر دجاج ( مقطع شرائح عريضة )
٢ ملعقة كبيرة زبادي
١ ملعقة كبيرة بهارات ماسالا
١ ملعقة كبيرة طماطم معجون
( ١ ملعقة كبيرة بصل ، ٢ فص ثوم ، ١ ملعقة صغيرة زنجبيل ) ، أول شيء نقطعها صغار ثم نهرسها زين
١ ملعقة صغيرة نشأ ( هذا من الأسرار اللي تخلي الدجاج لين ورطب )
شوي كركم ملح وفلفل
الطريقة :نحطهم كلهم سوا ونخليها تنقع ربع ساعة ، ثم نطبخها ونضيف ملعقة كبيرة صويا صوص وخل أبيض ، وملح وفلفل إذا احتجنا زيادة .


صوص الأعشاب :
٢ ملعقة كبيرة مايونيز
٢ ملعقة كبير سور كريم ( أو زبادي ولبنة ) عصرة ليمون
أعشاب طازجة ( كزبرة ، ريحان أو نعناع ، روزماري ، أكليل الجبل ، أو أي عشبة عطرية ) تفرم ناعم

 .
الطريقة :

نخلطهم سوا . تجهيز الساندويش : نجيب خبز الشيباتا ونقصه نصين ونحطه على صاج عشان يتحمر شوي من تحت ، نمسح شوي من صوص الأعشاب على نص الخبز الأول نحط خس ثم الدجاج وفلفل بارد ثم صوص الأعشاب ، وممكن نحط جبن موزاريلا مبشور مع سماق ، نغطيه بالجزء الثاني من الخبز ، ونغلفه ببلاستيك التغليف ثم نضغط عليهم عشان تتساوى ويصير شكلها مرتب ونقصصها مربعات وبس .. بالنسبة للخبزة الثانية ( نقصها نصين نحمصها نمسحها بشوي بيستو ونحط شرائح طماطم وجبن موزاريلا طازج ، أو تحطون حلوم مشوي إذا تحبونه) وبس .
.. الدجاج التندوري لذيذ مررره